Ko Faifekau Siupeli T. Taliai ‘oku ‘iloa ia ki he komiuniti Tonga, he ko e faifekau na’e ta’u lahi ‘ene faiako, pea ko e fuofua Puleako Tonga ia ‘i he Kolisi ko Tupou. Na’a ne hoko foki ko e Sekelitali ki he Konifelenisi ‘a e Siasi Uesiliana Tau’ataina ‘o Tonga kimu’a pea ne hiki atu ‘o ngaue fakafaifekau ‘i ‘Aositelelia. ‘Oku ‘iloa ‘a Siupeli ko e faifekau ‘oku makatu’unga ‘ene mo’uí mo ‘ene malangá ‘i he ngaahi mo’oni ‘o e Tohitapu. ‘Oku ne pole’i ma’u pe ‘a e kakaí ke nau muimui mo talangofua ki he ‘Eiki ko Sīsū Kalaisi – ‘i he mo’ui fakafamili, fakasiasi, mo fakafonua.

Ko e tohi mahu’inga ‘eni ki hono vete ‘o e kau ki he politikalé ‘a kinautolu koee ‘oku ‘apasia ki he ‘Otuá. Ko e tohi ni foki ko e ola ia ‘o ha ngaahi fakamatala fakakolomu na’e fai ‘e Siupeli ‘o pulusi hokohoko ‘i he ngaahi nusipepa Taimi ‘o Tongá, Tohi Fanongonongo pea mo e Taumu’a Lelei ‘Oku ‘oatu ‘a e ngaahi fakamatala ni ke ‘inasi ai ‘a e kakai ‘o e ngaahi komiuniti Tonga kehekehe ‘i mamani.